నా విదేశయాత్ర అనుభవాలు - 4 - USA - 3

 

Click here for నా విదేశపర్యటనలు – 4 – USA – 1

కూచిపూడి ఆర్ట్ అకాడెమీ, మద్రాసు, సంస్థతో శ్రీ నాన్నగారి అనుబంధం నాకు గుర్తున్నంత వరకు 1963లో పనగల్ పార్క్ ఎదురుగా ఆ నాట్య పాఠశాల ప్రారంభదినాలనుంచే. అకాడెమీ నాట్య కార్యక్రమాల్లో గాయకుడిగా, వీణావాద్యకళాకారుడిగా, సంగీతదర్శకుడిగా వివిధ అవతారాలలో సహకరించారు నాన్నగారు. 1974లో శ్రీ ఘంటసాలగారి నిర్యాణం తరువాత శాశ్వతంగా కూచిపూడి కార్యక్రమాల్లో పాల్గొనడం ప్రారంభించారు. 1975 - 2012 మధ్యకాలంలో సంగీత దర్శకుడిగానే కాక వీణావాదకుడుగా కూచిపూడి నాట్య గురువు శ్రీ వెంపటి చినసత్యంగారితో దేశవిదేశాలలో వందల సంఖ్యలో ప్రదర్శనలలో క్రియాశీలంగా పాలుపంచుకున్నారు. 2012 లో శ్రీ మాస్టరుగారి మరణం తరువాత కూడా అకాడెమీతో ఆ ఆత్మీయ అనుబంధం కొనసాగింది. 1987, 1988, 1989 సంవత్సరాలలో భారత ప్రభుత్వ సాంస్కృతిక శాఖ ICCR ఆధ్వర్యంలో జరిగిన India Festivals లో కూచిపూడి బృందం సభ్యుడిగా పాల్గొన్న కొన్ని విదేశపర్యటనలలో సంగీత కళాకారుడుగానే కాక సాహితీవేత్తగా కూడా నాన్నగారు నిక్షిప్తం చేసిన తన విదేశయాత్ర అనుభవాలను ఈ blog post ల ద్వారా పంచుకుంటున్నాను. నాన్నగారు ఈ పర్యటనలలో దర్శించిన  స్థలాల గురించిన ఆన్ లైన్ లో ఉన్న మరింత సమాచారాన్ని ఫోటోలను కూడా జత చేసేను. 

- పట్రాయని వేణు గోపాలకృష్ణ అనే గోపి 

నా విదేశపర్యటనలు – 4 – USA – 2

Philadelphia

19-8-94

ఫిలడెల్ఫియా పెన్సిల్వేనియాలో మరో నగరం. ఈ ఊళ్లో ఎవరింట్లో ఉన్నామో జ్ఞాపకం లేదు. ఎవరింట్లో ఉన్నా ఒకే తరహా భోజనం నిద్రాను. ఉన్నంత వరకూ వాంతా ఎంతో ఆదణగా చూస్తూ ఉన్నారు. ఇక్కడ శివదనుర్భంగం బాగా రక్తి కట్టింది. మర్నాడు న్యూజెర్సీ ఉదయం 11 గంటలకి. అనుకొన్న సమయానికి హైస్కూలు ఆడిటోరియం దగ్గర ఎవరూ నిర్వాహకులు రాలేదు. హైస్కూలు ముందు కొంత ఆవరణ ఉంది. ప్రహారీ గోడ లేదు. ఈలోగా అంటే పావు గంట తర్వాత ఒకాయన వచ్చేరు. మాకు తాగడానికి coke యిచ్చేరు. న్యూయార్క్ వరకు శ్రీ పప్పు వేణుగోపాలరావుగారు ఉండి మా కర్తవ్యాన్ని తెలియజేస్తూ ఉండేవారు. బస్సులో మా పెట్టెలు ఉన్నాయి కదా. ఆ పెట్టెలతో hosts యింటికి వెళ్లడం శ్రమ. అందుచేత రెండు రోజులకి కావలసిన బట్టలు తీసుకొండి యిక్కడే అని వేణుగోపాలరావుగు తెలియజేసేరు. పొలోమని అందరం బస్సులో సామాను తీసుకొని పెట్టెలు విప్పి హైస్కూలు ఆవరణలోనే అంటే pubic road సమీపంగా సర్దుకొంటున్నాం. ఇంతలో ఒక ఉరుము ఉరిమింది. మాస్టరుగారి గర్జన అది. బుర్ర తక్కువ పనులు. రోడ్డుమీద సర్దుకొడం ఏమిటి. లోపలికి పొండి, అన్నారు. వారు చెప్పేవరకు హైస్కూలు ఆడిటోరియం తలుపులు తెరవలేదు. ఆడపిల్లలు, పెద్దింటి పిల్లలు రోడ్డుమీద పెట్టెలు సర్దుకోవలసిన పరిస్థితి మాస్టరుగారికి దుర్భరం అనిపించింది. ఈ కార్యక్రమం ఏర్పాటుచేసిన కార్యకర్తలమీద ఏవో వాక్బాణాలు వేసేరు. ఈ కార్యక్రమం ఏర్పాటు చేసింద ఎవరో కాదు, మాస్టరుగారి హితైషులు, శ్రీ చలికొండ రామక్రిష్ణగారూ, కిడాంబి రఘునాథ్ గారూను.

భోజనాలు చేసుకొని, వెంటనే make-up లు చేసుకొని 6 గంటలకి ప్రదర్శనకి సిద్ధంకావాలని చెప్పేరు. అన్నీ అలాగే జరిగేయి. జరిగిన కార్యక్రమాల అన్నీ రక్తిగానే నడేచేయి. రాత్రి శ్రీ చలికొండ రామక్రిష్ణగారింట్లో మాస్టరుగారు, వారితో శశికళ, కల్పలతిక యిత్యాదులు కొందరు. మరికొంతమంది hosts మిగతావాళ్లని వాళ్ళవాళ్ల యిళ్లకి తీసుకొని వెళ్లేరు. సూర్యారావుగారు, నేను, ప్రకాశరావుగారు రఘునాథ్ గారింట్లో. ఆ రాత్రి మాట్లల్లో రఘునాథ్ గారు అడిగేరు మాస్టారుగారి ఆరోగ్యం గురించి. సూర్యారావుగారు శ్రీమతి రఘునాథ్ గారికి సంగీత విద్యా గురువు. వారింట్లో మేము సుఖంగా గడిపేం. శ్రీ చిత్తరంజన్ గారు కూడా ఆ మర్నాడు రఘునాథ్ గారింట్లోనే బస.

20-8-94

తరవాత మర్నాడు (20న అనుకుంటాను) న్యూయార్క్. మధ్యాహ్నం భోజనం న్యూయార్క్ temple లో. కాదుకాదు, అదేదో థియేటరు.లోగడ ఎప్పుడో గొప్ప ఎగ్జబిషన్ జరిగిన సందర్భంలో కట్టినది. అక్కడికే అందరం చేరేం. కార్యక్రమం అయిన తరవాత temple లో భోజనం. తర్వాత hosts యిళ్ళకి వెళ్లడం. ఆరాత్రి వర్షం. ఈ వర్షం అలా ఏదో వేళ పడుతునే ఉంది. కెనడా వచ్చినా వదలలేదు. న్యూయార్క్ లో శ్రీ శ్రీనివాసమూర్తిగారింట్లో మాస్టరుగారు, నేనూ ఉన్నాం. ఆయన డాక్టరు. ఆయన భార్య సైంటిస్టు. ఆయనది పర్లాకిమిడి ట. వెంటనే నేను బంధుత్వం కలిపేశేను. అతనికి భళ్లమూడి సీతారామమూర్తిగారు, ...

30-10-94

కస్తూరి సతీష్. విశాఖపట్నం చెందినవారు టలహస్సీలో వారింట్లోనే ఉన్నాం. వారింట్లో మంచి వీణ ఉంది. ఆయన భార్య కూడా విశాఖపట్నమే. చాలా మంచి మనిషి. నా యడల చాలా గౌరవం చూపించేరు. వెళ్లేటప్పుడు ఒక కవరు యిచ్చేరు. దానిలో 40 డాలర్లు ఉన్నాయి.     

---

అర్ధాంతరంగా ఇక్కడితో నాన్నగారి విదేశపర్యటనా అనుభవాలు ఆగిపోయాయి.

 

తరవాత పేజీల్లో ఇతర వ్యాసాలు మరింకేవో ఉన్నాయి.