నా విదేశయాత్ర అనుభవాలు - 4 - USA - 1

 

Click here for నా విదేశపర్యటనలు – 3 – యూరప్ – 10

కూచిపూడి ఆర్ట్ అకాడెమీ, మద్రాసు, సంస్థతో శ్రీ నాన్నగారి అనుబంధం నాకు గుర్తున్నంత వరకు 1963లో పనగల్ పార్క్ ఎదురుగా ఆ నాట్య పాఠశాల ప్రారంభదినాలనుంచే. అకాడెమీ నాట్య కార్యక్రమాల్లో గాయకుడిగా, వీణావాద్యకళాకారుడిగా, సంగీతదర్శకుడిగా వివిధ అవతారాలలో సహకరించారు నాన్నగారు. 1974లో శ్రీ ఘంటసాలగారి నిర్యాణం తరువాత శాశ్వతంగా కూచిపూడి కార్యక్రమాల్లో పాల్గొనడం ప్రారంభించారు. 1975 - 2012 మధ్యకాలంలో సంగీత దర్శకుడిగానే కాక వీణావాదకుడుగా కూచిపూడి నాట్య గురువు శ్రీ వెంపటి చినసత్యంగారితో దేశవిదేశాలలో వందల సంఖ్యలో ప్రదర్శనలలో క్రియాశీలంగా పాలుపంచుకున్నారు. 2012 లో శ్రీ మాస్టరుగారి మరణం తరువాత కూడా అకాడెమీతో ఆ ఆత్మీయ అనుబంధం కొనసాగింది. 1987, 1988, 1989 సంవత్సరాలలో భారత ప్రభుత్వ సాంస్కృతిక శాఖ ICCR ఆధ్వర్యంలో జరిగిన India Festivals లో కూచిపూడి బృందం సభ్యుడిగా పాల్గొన్న కొన్ని విదేశపర్యటనలలో సంగీత కళాకారుడుగానే కాక సాహితీవేత్తగా కూడా నాన్నగారు నిక్షిప్తం చేసిన తన విదేశయాత్ర అనుభవాలను ఈ blog post ల ద్వారా పంచుకుంటున్నాను. నాన్నగారు ఈ పర్యటనలలో దర్శించిన  స్థలాల గురించిన ఆన్ లైన్ లో ఉన్న మరింత సమాచారాన్ని ఫోటోలను కూడా జత చేసేను. 

- పట్రాయని వేణు గోపాలకృష్ణ అనే గోపి 

నా విదేశపర్యటనలు – 4 – USA – 1

Philadelphia*

19-8-94

ఈరోజు శ్రావణ శుక్రవారంట. ఈ యింటి ఆమె మేము లేచేసరికి వరలక్ష్మి పూజ చేస్తోంది ఇండియా నుంచి తెచ్చుకొన్న వరలక్ష్మివ్రతం cassette పెట్టుకొని. ఇంటి ఆయన మద్రాసేట. వెంకట నారాయణా రోడ్డులో. ఆ అమ్మాయిది విశాఖపట్నం. చిత్రం, వాళ్ల పేర్లు తెలియవు నాకు.

ఇలాంటి మా పర్యటనలలో ఎంతోమందిని కలవడం, వాళ్ల ఆతిథ్యం పొందడం, కలిసి ఉన్న ఆ కొద్ది గంటలూ ఎంతో ఆత్మీయంగా ఉండడం జరుగుతుంది. తరవాత వాళ్లు ఎవరో మనం ఎవరో.

మనవాళ్ల అమెరికన్ జీవితంలో పూజలు ఒక భాగం. ఇల్లు దాటితే మరో ప్రపంచంలో బతకాలి. అందుచేత ఉన్న కొద్ది గంటలూ ఇండియాలోనే ఉన్నామనే భ్రమ కలిగించుకొంటారనుకొంటాను.

ఆయన పేరు కనుమల రమణ. ఆ అమ్మాయి, ఆయన ఇద్దరూ ఆఫీసులకి పోయేరు. వెళ్లేముందు నా యడ్రసు రాసుకొన్నారు. వంటయిల్లు శశికళ, కల్పలత స్వాధీనం చేసుకొన్నారు. శ్రీ మాస్టరుగారు పర్యవేక్షిస్తున్నారు. నేను తామరాకు మీద నీటిబొట్టులా ఉన్నాను. భోజనభాజనాల్లో మాత్రం కాదు.

ఆగస్టు 1 తేదీ రాత్రి అంటే 2 తేదీ 2 గంటలకి మద్రాసులో బయలుదేరి బొంబాయిలో మారి 2 తేదీ సాయంత్రానికి న్యూయార్క్ చేరేం. విమానంలో కూర్చుని కూర్చొని కాళ్లు బిగుసుకుపోయేయి. న్యూయార్కులోని దేవాలయంలో మాకు భోజనాలు. అక్కడనుంచి బస్సులో పిట్స్ బర్గు చేరుకొన్నాం. ఈ న్యూయార్క్ కోవిల, అక్కడ శ్రీ KV రావుగారూ, శ్రీ చలికొండ రామక్రిష్ణగారూ చాలా కాలంగా తెలుసును.

Skyline of Philadelphia Center City

* Philadelphia, famously known as the "City of Brotherly Love," is Pennsylvania's most populous city and the nation's sixth-most populous. Located in the northeastern United States, it is celebrated as the birthplace of American democracy and serves as a major cultural, historical, and economic hub.